Шэраг інцыдэнтаў адбыўся на святкаваннях з нагоды Дня настаўніка ў беларускай вёсцы (+mp3)

Святкаванні з нагоды Дня настаўніка абярнуліся ў вёсцы Мажджаліна шэрагам неверагодных інцыдэнтаў. 30 верасня на школьным падворку адкрыўся спецыяльны фантан для настаўнікаў. Але ніхто з педагогаў, хто меў ахвоту паплёскацца ў ім, так і не здолеў гэтага зрабіць. У фантане ад самага пачатку віднеліся плаўнікі акулаў, і аднекуль гучала музыка з фільма “Сківіцы”. У ноч на 1 кастрычніка адтуль усплыла падводная лодка і стаяла на рэйдзе аж да раніцы 3 кастрычніка.

Апошні факт вельмі засмуціў педагогаў, што завіталі ў вёску наўмысна дзеля фантана. Госці з сузор’я Стральца ўвогуле палічылі наяўнасць субмарыны пагрозай для сябе і паспрабавалі атакаваць яе з дапамогай лазерных указак. Падводная лодка адказала ракетным ударам, які паглынула чорная дзірка, якая ўтварылася ў ружовым тумане (ці туманнасці), што з 27 верасня пакрывае сабой усю вёску.

Мой свет загадак і цудаў

Настаўнік грамадазнаўства з сузор’я Стральца пераконвае беларускіх калегаў у перавагах асобаснаарыентаванага навучання

Байцы АМАПу хацелі заклікаць далёкіх гасцей да парадку, але так і не знайшлі іх за гушчай туману (ці туманнасці). Паводле неправераных звестак “стральцы” выбраліся з вёскі і адзначалі прафесійнае свята на хутары, дзе жыве настаўнік гісторыі Юрась Неспакойны, за няхітрым абменам вопытам пад немудрагелістую закусь.

Мой свет загадак і цудаў

Абмен педагагічным вопытам у нефармальных умовах беларускага хутара

Тым часам маладыя спецыялісткі Дар’я Сумбурская, Лэйла Акцябская і Аліна Папалава, збіраючыся святкаваць Дзень настаўніка ў інтэрнаце, вырашылі прыгатаваць салат “Аліўе”. Аднак салат не толькі адмовіўся гатавацца, але яшчэ і ўчыніў супраціўленне. Дзяўчатам давялося абараняцца доўгімі нажамі і электрашокерам, замаскіраваным пад запальнічку. Толькі пасля гэтага “Аліўе” мусіў здацца. Крыніцы вартыя даверу паведамляюць, што салат атрымаўся смачным. Мы хацелі адправіць да маладых спецыялістак нашага эксперта, але перадумалі.

Мой свет загадак і цудаў

Маладыя спецыялісткі пасля падаўлення супраціву з боку “Аліўе”

Застаецца толькі цешыцца, што ўсе названыя інцыдэнты ўключна з туманам (ці туманнасцю) не перашкодзілі мажджалінскаму дыджэю Грышку Савасцеву (ён жа DJ Mazdzaliniec) прэзентаваць 2 кастрычніка ў вясковым клубе абяцаны танцавальны мікс, прысвечаны спрытнай вавёрцы Ніне. Пад яго танчылі і маладыя, і старыя, і байцы АМАПу, і тое ружовае покрыва, што абхінула нашу вёску. DJ Mazdzaliniec ласкава пагадзіўся змясціць свой твор на нашым сайце. Прыемнага слухання!

Спампаваць: DJ Mazdzaliniec – Вавёрка Ніна