Праз цэнтральную вуліцу Мажджаліны Ляксей Пустабышаў імчыць вызваляць сонца

Надзвычайная сітуацыя склалася сёння зранку на ўсходзе ад вёскі Мажджаліна. Сонца, якое павінна было своечасова ўзняцца ў неба, раптоўна спыніла свой рух. Вялікая затрымка з гэтым магла б выклікаць каласальны міжнародны рэзананс і прычыніцца да падзення аўтарытэту Мажджаліны ў свеце.

Аднак выправіць сітуацыю дапамог народны ўмелец Ляксей Пустабышаў. Узяўшы з сабой пэўныя прыстасаванні, Ляксей на сваім удасканаленым матацыклеце скіраваўся да нерухомага сонца. Дзякуючы яго майстэрству і прыроднай кемлівасці, вясковец здолеў-ткі запусціць сонца ўручную. Паводле яго словаў, сонца зачапілася за пень колішняга дуба.

Гэта вельмі стары пень, які адны клічуць Сувораўскім, другія – Касцюшкаўскім, а трэція – Трухлявым. Згодна з народным паданнем пень з’явіўся ў канцы XVIII ст. пасля спілавання невядомымі ў цывільным шматвяковага дуба.

Якім месцам сонца зачапілася за памянёны пень, і што за інструмент выкарыстоўваўся для яго вызвалення і далейшага запуску, Ляксей Пустабышаў паведамляць адмовіўся.

Застаецца толькі цешыцца, што народны ўмелец не забраў нашу журналістку катацца на матацыклеце.