Дырэктар грамадскай лазні вёскі Мажджаліна Серафім Саўрасавіч Куродымскі ледзьве не стаў ахвярай найманага забойцы. Сёння ўвечары пасля працоўнага дня «начальнік мачалак» вырашыў скарыстацца службовым становішчам і залез памыцца ў адну з нешматлікіх ваннаў. Па даўняй звычцы ён прыхапіў з сабой гумавую вутачку і «маленькую паўтарачку» піва айчынных вытворцаў.

Пакуль Серафім Саўрасавіч кунежыўся ў гарачай вадзе, гуляючыся з вутачкай і пляшкай, у лазню пранік сумнавядомы Хітман. Ён прыхапіў тостар, набыты для лазні за дзяржаўныя грошы, і вырашыў зрабіць дырэктару смерць, укінуўшы ўключаны агрэгат для запякання хлеба ў ванну.

Але гумавая вутачка і пляшка піва палічылі кіданне тостара за новую лазневую гульню і годна вытрымалі падачу, адзіным парывам выштурхнуўшы небяспечны прадмет далёка за межы лазні. Тостар, адлятаючы, зрабіў ладную дзірку ў сцяне. Бачачы, што заданне правалілася, Хітман забег у парылку і знік. Куродымскі нават не паспеў адразу зразумець, што адбылося, думаючы, што сценку паламалі яго няўрымслівыя паклонніцы. Толькі праз гадзіну да яго дайшло.

Па факту здарэння ўзбуджана крымінальная справа. Згодна з працоўнай версіяй следства Хітман апынуўся ў Мажджаліне выпадкова з-за памылкі амерыканскага праграміста Джона Кайфа ў выбары рэстарацыі хуткага харчавання.

Серафім Саўрасавіч паціху адыходзіць ад таго, што да яго найшло. Вутачка і пляшка адчуваюць сябе героямі. Тостар паспяхова прызямліўся на Краснай плошчы ў Маскве. Аднак факт прызямлення замоўчваецца расійскімі інфармацыйнымі агенцтвамі, якія асцерагаюцца сваім лішнім шумам разбудзіць каго-небудзь у тым раёне.

Застаецца толькі цешыцца, што тостар не прыхапіў у «белакаменную» усю лазню цалкам – такі паварот значна ўскладніў бы працу айчынных следчых органаў.